Poslovne vijesti - Makedonija

Идната година сериозни холандски инвестиции во земјава

Се интензивира бизнис-соработката меѓу Македонија и Холандија. Покрај добрата туристичка соработка наскоро се очекува и зголемување на инвестициите во земјава од страна на Холандија во повеќе сектори и индустриски гранки.

Според Симоне Филипини, амбасадорка на Кралството Холандија во земјава, со формирањето на Холандско-македонската стопанска комора ќе се збижат стопанствениците од двете земји и ќе се зацврсти нивната заедничка соработка.

- Меѓу двете земи има можности за разновидна соработка, а една од нив е и туризмот. На 29 април година се очекуваат првата група на холандски туристи, а потоа два пати неделно од Амстердам ќе пристигнуваат туристи, но и бизнисмени - нагласува Филипини најавувајќи го чинот на формирањето на NL Chamber како официјална Холандско-македонска стопанска комора. Генералното собрание на педесетте членки-основачи на Комората предвидено е да се одржи во јуни годинава.

За министерот за економија, Фатмир Бесими, соработката со Холандија не смее да се темели само на туризмот.

- За една година очекуваме од Холандија сериозни инвестиции во земјава, бидејќи се работи за земја која што има развиена економија и соработката ќе биде многу корисна за македонското стопанство - смета Бесими.

Адриан ван дер Флир, ицицијаторот и идниот претседател на Холандско- македонската комора вели дека идејата за нејзиното создавање започнала пред една година.

- Речиси во секоја гранка може да соработуваме, како што е индустријата, ИТ секторот, но и во земјоделието има можности за разновидна соработка. Во Македонија дојдов пред четири години и започнав бизнис, односно формирав фирма за компјутерски игри. Задоволен сум, бидејќи во земјава има солидни програмери, а нашите производи се пласираат во светот - вели Флир.

Тој појасни дека главниот мотив за холандските инвеститори не е евтината работна сила, туку квалитетниот кадар со којашто Македонија, за среќа, располага.